سلام عليكم ، أنا عبد الله وهدي حكايتي مع الضيقة
كلش بدا عندها ستة أشهر ، حبيت نديرشوية لا طاي باش تحبس مرتي متجبدليش على كرشي ⛹️♂️ ، ودخلت مع صحابي تع الخدمة في فريق تاع البالون
بديت مني “سيريو” وطحت عليها “تدريبات، تدريبات تقولشي رونالدو” – (ولي يحب ميسي قولولو أنا ما عندي ما نديربيه . )
نهار الماتش ، انصدمت بالحقيقة وسقطت كل أحلام كابتن ماجد ⚽- المدعو عبد الله- . مزال ما بداش اللعب، حتى بديت نحس تقولشي راني رافد 25 كيلو سميد فوق صدري ، رجليا تقالو قولشي لا ميموار تاع تيليفون معمرة. بصح الضربة كامل في النفس – حسيت بلي خلاصتالقرعة تاع الغاز . ما جازتش ربع ساعة حتى حبست ، مقدرتش نكمل نجري . ، وليت نعرق تقولشي نافورة تاع الشامنوفر (ساحة اول ماي)، الهدرة بسيف ، وفجأة ” بدأ الخوف “و “لا بانيك” .حكمتني 😱 ـ .
من الاول قلت لروحي حاجة نورمال عندي بزاف ملعبتش ، والهواء اليوم تقيل . بصح خلاص الماتش والنفس ما حبش يرجعلي . كنت نسعل كي شغل عندي 30 سنة دخان وانا عمري ما درت “قارو” نسيم في فمي . في الليلة هديك ما خليت حتى واحد يرقد ، وداتني الفطنة في الليل مخلوع حاب نعيط والهواء تاع الدار كامل ما كفانيش . حسيت تقولشي “ايليفون”🐘 معانقني .
ويوم مور يوم بديت نكره نتحرك ، وليت نعيا بزاف وطحت في الميزان . واحد النهار كنت في الدار ، والمخلوقة مرتي طايحة عليها جافيل وتسياق وتحكمني السعلة يا وليدي والروح قريب خرجت 😱 . شافتني المرا قاتل “يالهم واقيل راك تتكيف بالتخبية عليا 🚭” بصح كي شافت عينيا خرجو وشواربي زراقو – راحت عيطَت لخويا جا داني للسبيطار
🙏 تحياتي مرتي لعزيزة – كنت زدت شوية لو كان الدايم ربي.
في السبيطار وش نقولكم . الترحاب على الطريقة الجزائرية -الطبيب حاب يضرب خويا بدماغ – قالو وشبيكم علاش خليتو المخلوق هكدا؟ راه الاكسجين كامل خلاصلو – – نقولكم الصح كي سمعتو قالو هكداك حسيت روحيت اكتور(ممثل) تاع الفيلم هداك الي قعد وحدو في المريخ 🚀 المهم وش نحكيلكم ، راديوات ودمومات و”الفام دو ميناج” خبطتنا بشوية تشنيفات – و خلاصت عليا بليلة في “غرفة 5 نجوم” 🏦 مع خويا شعبان والشلة تاع الاستعجالات وتحياتنا الكبيرة للوزير تاع الصحة والسبيطارات
مع الخرجة الحق يقال – حكمني طبيب -لي قريب ضرب خويا شعبان على طريقة زيدان – وفهمني بلي هدا يسموه “لازم” يعني بالعربية الضيقة -وقال لي بلي هو مرض مزمن “يلهَّب” ويغلق” التيوات” تاع الهواء في الصدر . فهمني بلي يقدر يكون وراثي وبلي “اللازم” هدا ما يحبش الربيع والغبرة والشعر تاع القطوطة 🐱.. قالي الرياضة مليحة بصح نروح غير بلعقل ورونالدو غير مايشقاش نعاندو – . عطالي الدوا -شويا بخاخات – وفهمني بلي لازم يكون فيها لقائات ودية معاه في فندق 5 نجوم نتاعنا -باش نتحكموا في المرض ونكمل يعني -الخدمة والرياضة والحرب الباردة مع المخلوقة
درك الحمد لله راني لاباس راني نتبع طبيب تاع الحومة ، ونرد بالي خاصة كي يكون الحال تقيل . اما البالون راني استعقلت نلعب قيس. دراهمي وراني ماركيت روحي في لابيسين تاع الحومة..
أقرأ المزيد عن الموضوع في مقالنا المتخصص